Ötən həftənin sonu Belçikanın Gent şəhərində bədii gimnastika üzrə "Happy Cup" turniri keçirilib. Xəbərçi.az trend-ə istinadən bildirir ki, Azərbaycan Gimnastika Federasiyasının yığma komandası 4 qızıl və 1 bir gümüş medal qazanıb.
Bütün medalları komandanın üzvü Zöhrə Ağamirova əldə edib.
O, ilk qızılını məhz ən çətin proqramda - çoxnövçülükdə əldə edib. Daha sonra o, halqa, gürzlər və lentlə də final mərhələlərində növbəti 3 qızıl medala yiyələnib. Z.Ağamirova 1 gümüş medalını isə topla hərəkətlərdə qazanıb.
Turnirdə "yunior" proqramda ölkəmizi təmsil edən gimnastımız Yelizaveta Luzan isə iki finalda çıxış edib. Gənc idmançımız 57 iştirakçı arasında lentlə 4-cü, topla isə 5-ci yerdə qərarlaşıb.
